Wizz Air vendos linjë direkte me Sofjen për muajt e verës, nga 25 euro një drejtim

2026-03-03 - 15:04

Wizz Air, linja ajrore më e madhe në Shqipëri, njoftoi sot hapjen e një linje të re direkte nga Tirana (TIA) në Sofje (SOF), duke forcuar më tej lidhjet rajonale mes Shqipërisë dhe Bullgarisë. Nga data 4 korrik 2026, linja ajrore do të nisë fluturimet direkte mes Tiranës dhe Sofjes, të cilat do të operojnë gjatë pikut të sezonit veror, tri herë në javë, çdo të martë, të enjte dhe të shtunë. Çmimet e biletave nisin nga vetëm 24.99 EUR / 2,490 ALL dhe janë të disponueshme në wizzair.com si dhe përmes aplikacionit zyrtar të Wizz. Sofja, një nga kryeqytetet më të vjetra të Evropës, ofron një kombinim të pasur historie, kulture dhe jete dinamike urbane, si dhe qasje të malit Vitosha. Linja e re u ofron udhëtarëve shqiptarë një destinacion tërheqës për pushime të shkurtra në qytet, ndërsa pasagjerëve bullgarë u mundëson qasje drejt bregdetit dhe mikpritjes shqiptare. Vera Jardan, Menaxhere e Komunikimit Korporativ në Wizz Air, u shpreh: “Jemi të kënaqur të zgjerojmë rrjetin tonë nga Tirana me hapjen e destinacionit Sofje. Duke operuar me avionët tanë Airbus A321neo, ne kombinojmë efikasitetin, qëndrueshmërinë dhe rehatinë, ndërsa forcojmë më tej lidhjen mes Shqipërisë dhe Bullgarisë.”, sipas njoftimit zyrtar të Wizz.