Porti i ri i Porto Romanos, më 9 mars shpallet fituesi

2026-02-25 - 14:23

Projekti madhor për ndërtimin e Portit të Ri Tregtar në Porto Romano ka hyrë në një fazë të re sa i përket afateve zyrtare të prokurimit. Pas më shumë se një viti të mbushur me vlerësime teknike dhe procese ankimimi, Autoriteti Portual i Durrësit ka përditësuar kalendarin e kësaj procedure, e cila kap vlerën rekord prej 39.3 miliardë lekësh të financuara nga Buxheti i Shtetit. Sipas të dhënave të fundit Agjencia së Prokurimit Publik, data e mbylljes përfundimtare të kësaj procedure është zhvendosur për në 9 mars të vitit 2026, duke i dhënë kohë plotësimit të të gjitha etapave ligjore për këtë vepër me rëndësi strategjike. Ecuria e këtij tenderi nisi zyrtarisht në fund të vitit 2024, ku në garë u paraqitën pesë operatorë dhe bashkime kompanish ndërkombëtare me peshë në industrinë e ndërtimit detar. Gjatë muajit prill të vitit 2025, Komisioni i Vlerësimit të Ofertave njoftoi se pas fazës së para-kualifikimit, vetëm kompanitë “Archirodon Construction” dhe “Van Oord Dredging and Marine Contractors” arritën të kalonin filtrat teknikë, ndërkohë që emra të njohur si “Ëebuild” dhe bashkimi i operatorëve i udhëhequr nga “Jan De Nul” u skualifikuan nga gara. Ky vendim solli edhe përplasjen e parë ligjore pranë Komisionit të Prokurimit Publik. Grupi i udhëhequr nga “Jan De Nul” dorëzoi një ankesë zyrtare duke kundërshtuar skualifikimin, por pas shqyrtimit të rastit, KPP vendosi ta rrëzojë këtë kërkesë në fund të prillit 2025, duke i dhënë të drejtë autoritetit kontraktor të vijonte me hapat e mëtejshëm. Deri në shtator të vitit 2025, situata e garës u ngushtua akoma më tej, ku sipas të dhënave të hapura të prokurimit, vetëm një ofertë ekonomike rezulton e kualifikuar për të vijuar drejt nënshkrimit të kontratës. Me afatin e ri të mbylljes në mars 2026, projekti pritet të hyjë në fazën e zbatimit, ku fituesi do të ketë në dispozicion një periudhë prej 40 muajsh për të realizuar fazën e parë të portit. Kjo fazë përfshin një vëllim të madh punimesh që nga gërmimet e thellimit, ndërtimin e marinave, e deri te infrastrukura kritike e linjave të energjisë dhe komunikimit, duke e shndërruar Porto Romanon në nyjen kryesore tregtare të rajonit.