Hotelet pritën më shumë vizitorë në janar, dominuan Italia, Kosova dhe Gjermania

2026-03-17 - 10:52

Strukturat turistike në vend pritën më shumë vizitorë në janar 2026 krahasuar me të njëjtën periudhë të një viti më parë. Të dhënat zyrtare të publikuara nga Instituti i Statistikave (INSTAT) mbi strukturat akomoduese tregojnë se në Janar 2026, numri i vizitorëve që u akomoduan në strukturat turistike në Shqipëri u rrit me 15,1 %, krahasuar me të njëjtin muaj të vitit të kaluar. Rritjen më të madhe e kanë pasur vizitorët rezidentë. Konkretisht këta të fundit u rritë me 16,8 %, ndërsa vizitorët jo-rezidentë me 13,8 %. Sa i takon netqëndrimeve ato u rritën gjithsej me 9,0 % ku net-qëndrimet e vizitorëve rezidentë u rritën me 16,4 % kurse ato të jo-rezidentëve u rritën me 4,3 %. Tendenca gjeografike se nga vijnë vizitorët e hua trigon pak a shumë të njëjtën panoramë që paraqet edhe ajo e lëvizjes së shtetasve por edhe të dhënat që raportojnë zakonisht turoperatorët. Italia vijon të mbetet dominuese duke lënë në vend të dytë vizitorët nga Kosova. Gjermania ka fituar gjithashtu peshë njësoj siç po vihet re edhe tendenca nga Britania apo Franca. Sipas INSTAT nga Italia erdhën 25 % e vizitorëve të akomoduar në struktura, nga Kosova 14%, Gjermania 6% dhe vizitorët nga Mbretëria e Bashkuar dhe Franca përbëjnë përkatësisht 5 % dhe 4 %. Nga vende të tjera janë 46 %. Norma e shfrytëzimit të dhomave në hotele arriti 15,4 %, nga 14,5 % në Janar 2025. Viti 2026 edhe pse ka nisur me një ecuri të ngadaltë sa i taon turizmit sidomos si efekt i motit që nuk ka qenë aspak i qëndrueshëm në dy muajt e parë të vitit, pritet që të ketë një bilanc pozitiv. Turoperatorët mendojnë që rritja do të jetë në të njëjtat nivele të një viti më parë por nënvizojnë se një seri pasigurish të lidhura me sektorin mund të kenë ndikimet e tyre në vijëmsinë e tij.