Google lidh IA me Gmail dhe Photos, ngre shqetësime për privatësinë

2026-01-26 - 10:41

Google ka njoftuar zgjerimin e funksionalitetit të AI Mode brenda motorit të kërkimit duke prezantuar një eksperiencë të re të quajtur Personal Intelligence. Me këtë opsion, përdoruesit e abonimit AI Pro dhe AI Ultra mund të zgjedhin të lidhin llogaritë e tyre të Gmail dhe Google Photos me AI Mode, për të marrë rezultate kërkimi më të personalizuara bazuar në kontekstin e jetës së tyre. Si funksionon? Me Personal Intelligence, AI Mode mund të referohet në të dhëna nga email-et dhe fotot e përdoruesit për të nxjerrë sugjerime të detajuara që reflektojnë interesat dhe planet personale të tyre. Për shembull, në vend që të shfaqë lista të përgjithshme të destinacioneve apo produkteve, AI Mode mund të sugjerojë aktivitete, restorante apo rroba të përshtatshme bazuar në rezervimet e udhëtimeve apo imazhet nga albumet personale. Google thekson se ky është një funksionalitet eksperimental i lançuar përmes Labs dhe se përdoruesit duhet të japin pëlqimin e tyre për të lidhur aplikacionet e tyre me AI Mode. Gjithashtu, kompania shpjegon se AI Mode nuk stërvitet direkt mbi të dhënat e përdoruesit në Gmail apo Photos; në vend të kësaj, ai përdor informacionin vetëm për pyetjet konkrete që përdoruesi kërkon të përgjigjet. Shqetësime për privatësinë Megjithatë, lidhja e përdoruesve me shërbimet e tyre personale ka ngjallur shqetësime për privatësinë. Google e ka vendosur Personal Intelligence si një opsion që përdoruesit mund ta ç’aktivizojnë në çdo kohë përmes cilësimeve të personalizimit. Megjithatë, ekspertët dhe përdoruesit po debatojnë se sa larg mund të shkojë kjo integrim pa kompromentuar sigurinë e të dhënave personale. Ky hap shënon një zhvillim të rëndësishëm në evolucionin e inteligjencës artificiale të motorit të kërkimit të Google, duke shndërruar përgjigjet e një kërkimi nga një përvojë e përgjithshme në një asistencë që ndjek interesat dhe kontekstin individual të secilit përdorues. / The Verge