FMN krijon qendër rajonale për zhvillimin e kapaciteteve, përfshihet dhe Shqipëria

2026-03-24 - 10:12

Fondi Monetar Ndërkombëtar (FMN) njoftoi se do të krijojë një qendër të re rajonale për zhvillimin e kapaciteteve në Romë, Itali, me synim forcimin e institucioneve ekonomike dhe përmirësimin e politikëbërjes në vendet e Europës Juglindore. Qendra e re, e quajtur Southeast Europe Technical Assistance Center (SEETAC), do të bashkëpunojë me vendet e Ballkanit Perëndimor—Shqipërinë, Bosnjë-Hercegovinën, Kosovën, Malin e Zi, Maqedoninë e Veriut dhe Serbinë—si edhe me Moldavinë, të gjitha vende që synojnë anëtarësimin në Bashkimin Europian. SEETAC pritet të nisë funksionimin në janar të vitit 2027. Drejtoresha menaxhuese e FMN-së, Kristalina Georgieva, deklaroi se krijimi i kësaj qendre do të ndihmojë në përmbushjen e nevojave të rëndësishme për zhvillimin e kapaciteteve në vendet anëtare të rajonit, duke forcuar stabilitetin makroekonomik, qëndrueshmërinë, perspektivat e rritjes dhe progresin drejt integrimit në BE. SEETAC do t’i bashkohet rrjetit global prej 17 qendrash të ngjashme të FMN-së dhe do të ofrojë asistencë teknike të përshtatur në fusha kyçe të menaxhimit makroekonomik, si politika fiskale, politika monetare dhe sektori financiar, kuadri makroekonomik dhe parashikimet, statistikat dhe çështjet ligjore. Kjo qendër do të plotësojë gjithashtu programet e trajnimit që FMN ofron për rajonin përmes Institutit të Përbashkët të Vjenës (JVI).